မိုင်းတုံမြို့နယ်၌ VDP စီမံကိန်းရန်ပုံငွေကျပ်သိန်း ၁၀၀၀ လွှဲပြောင်းပေးအပ်

Date : 24 July 2022

သမဝါယမနှင့်ကျေးလက်ဖွံ့ဖြိုးရေးဝန်ကြီးဌာန၊ရှမ်းပြည်နယ်(အရှေ့ပိုင်း) မိုင်းဆတ်ခရိုင်၊ မိုင်းတုံမြို့နယ် ကျေးလက်ဒေသဖွံ့ဖြိုးတိုးတက်ရေးဦးစီးဌာနက ၂၀၂၂-၂၀၂၃ ဘဏ္ဍာနှစ်တွင် အကောင်အထည်ဖော်ဆောင်ရွက်မည့် ကျေးရွာဖွံ့ဖြိုးတိုးတက်ရေးလုပ်ငန်း(VDP) စီမံကိန်းဝင် ကျေးရွာများအား စီမံကိန်းရန်ပုံငွေကျပ်သိန်း ၁၀၀၀ လွှဲပြောင်းပေးအပ်ပွဲကို ဇူလိုင် ၂၃ ရက်တွင် အဆိုပါ ဦးစီးဌာနအစည်းအဝေးခန်းမ၌ ကျင်းပသည်။

          အခမ်းအနားတွင် မိုင်းတုံခရိုင် အုပ်ချုပ်ရေးမှူး ဦးလွင်မိုးက အမှာစကားပြောကြားပြီး မြို့နယ်ကျေးလက်ဒေသဖွံ့ဖြိုးတိုးတက်ရေးဦးစီးဌာန ဦးစီးမှူး ဦးစိုင်းအောင်မျိုးထက်က စီမံကိန်း ရန်ပုံငွေလွှဲပြောင်းပေးအပ်ရခြင်း ရည်ရွယ်ချက်များ၊ကျေးရွာမှဆောင်ရွက်ရမည့်လုပ်ငန်းစဉ်များကို ရှင်းလင်းပြောကြားသည်။

          ထို့နောက် တက်ရောက်လာကြသော ခရိုင်အုပ်ချုပ်ရေးမှူး၊ မြို့နယ်အုပ်ချုပ်ရေးမှူး၊ မြို့နယ်ဦးစီးမှူးနှင့်တာဝန်ရှိသူများက ကျေးရွာဖွံ့ဖြိုးတိုးတက်ရေးလုပ်ငန်းစီမံကိန်း အကောင် အထည်ဖော်ဆောင်ရွက်မည့် နမ့်ယွန်းကျေးရွာ၊ ကြယ်ပဲကျေးရွာ၊ ကုန်းဆာကျေးရွာ၊ ဂေါ်တောကျေးရွာ၊ ပိန်းမုံကျေးရွာ၊ ပါခါးကျေးရွာ၊ မယ်ရိုးခါးကျေးရွာ၊ ဟွေရှဲန်လုံကျေးရွာ၊ အောင်ချမ်းသာကျေးရွာနှင့်လုပါခိုင်ကျေးရွာ တို့မှ ကော်မတီဝင်များထံသို့ စီမံကိန်းပံ့ပိုးရန်ပုံငွေ ကျပ်သိန်း ၁၀၀ စီကို အသီးသီးလွှဲပြောင်းပေးအပ်ကြောင်း မိုင်းတုံမြို့နယ်ကျေးလက်ဒေသဖွံ့ဖြိုး တိုးတက်ရေးဦးစီးဌာန ဦးစိုင်းအောင်မျိုးထက်ထံမှ သိရသည်။